سنة جديدة يارب تكون سعيدة

سلام عليكم

كل سنة وانتم طيبين

سنة هجرية جديدة وسنة ميلادية جديدة

يارب الاتنين يكونوا احسن من اللى قبلهم ويعدوا على خير

ويارب العالم كله يكون احسن ونتعلم من اخطائنا

بخصوص البوست اللى فات

باشكر جدا كل اللى ردوا

محمد

نبيل

د/ عمرو

ادم

فارس

مونى

باشكركم جدا على كلامكم الجميل

اللى فعلا خلانى اعيد تفكير فى كل حاجة

فكرت انى باحكم على نفسى بالاعدام

باتخلى عن الحاجة اللى باحبها وباستمتع بيها

وفعلا قررت انى هاظبط الامور بحيث ارضى جميع الاطراف

ربنا يخليكم ليا وميحرمنيش منكم ابدا

ودايما تكونوا جنبى لانى من غيركم اكتشفت انى ولا حاجة

نهاية الرحلة

خلال رحلة البحث عن شخصيتى الحقيقية او كيانى

اكتشفت ان عندى شخصيتين

الشخصية الاولى ودى فى البيت مع بابا وماما واخواتى

ودى بنوتة خجولة جدا وحساسة وكتومة وزى البسكوتة وملهاش فى اى حاجة غير المزاكرة والمطبخ وصاحباتها

بتحترم كل الناس بغض النظر عن انها بتحبهم او لا

والشخصية التانية هى الاحسن بالنسبة الى باحبها اكتر

ودى بنوتة اجتماعية جدا دمها خفيف الى حد ما

بتحب كل الناس اللى حواليها

بتحب اصحابها وزمايلها اوى وشايفة انهم بجد اخوات ليها وتقدر تعتمد عليهم

ليها مدونة ومشتركة بمنتديات كتير وعلى الفيس بوك

بتكتب خواطر واغانى

بتقرا شعر وروايات رومانسية واجتماعية

بمعنى تانى

عندها حياة

تعرف ناس كتير اوى

والحمد لله ناس كتير منهم بيثقوا فيها وبيأتمنوها على اسرارهم

بس برضه فى حدود عندها لكل حاجة حتى الكلام

بتحاول متعملش حاجة غلط عشان احترامها لنفسها ولاهلها

المشكلة ان الشخصية التانية مخفية عن الناس الاولانيين

لانهم عملوا مشاكل لما عرفوا جزء من حياتها التانية

بس انا تعبت

تايهه بين الاتنين

بين اللى باحبة ومش مفروض اعمله

واللى باكرهه ومفروض عليا

عشان كدة قررت اتخلى عن شخصية من الانتين

هاتخلى عن التانية

بس عايزة اقول لكل حد عرفته

انا باحبك اوى اوى اوى

وانت بجد كنت حد مميز فى حياتى

وارجو محدش يزعل منى ابدا ابدا

الحب

1- الحب ايدين تطبطب وحنية وحنين وحضن فى يوم ما نتعب ودوا للمجروحين

(تتر مسلسل مباراة زوجية )

௨- الحب حلاوته فى ايه غير قلب بيحضن قلب وحبيب بيقول لحبيبه دة انا اول مرة احب

(أغنية ضمينى لايمان البحر درويش)

كلام فى الحب

*‏ ممكن ان تعطي دون حب‏,‏ مستحيل أن تحب دون أن تعطي‏!

‏! أنت لا تحب امرأة لأنها جميلة‏,‏ وانما هي جميلة لأنك تحبها*‏

*‏ لاتتزوج المرأة التي تريد ان تعيش معها‏,‏ وانما المرأة التي لا تستطيع ان تعيش بغيرها‏!

اى دمعة حزن لااااااااااا

مش عايزة الحزن تانى
يملا كل الاغانى
انا عايزة الفرحة دية
تبقى فى كل المعانى
مش عايزة اشوف دموع
قلب فى يوم اتجرح
ولا عايزة اشوف ملامح
قلب من شوقه اتوجع
انا عايزة الكل يفرح
عايزة الكل يرقص
عايزة الكل ينسى ...انه مرة اتجرح
يرجع يعيش حياته
ينسى كل اللى فاته
ويدور على اللى يخلى قلبه ينشرح
يدور بين جيرانه
يدور بين صحابه
واكيد فى يوم هيلقى
اللى يطيب ألامه
ومن تانى هارجع اقول
انسى اللى فاتك
عيش حياتك
وامسح الالم من ذكرياتك

ساعات

ساعات احب اعيش

وساعات الدنيا متهمنيش

وساعات الفرحة متسبنيش

وساعات الحزن مينسانيش

ساعات الحب يملانى

وساعات الجرح ينسانى

وساعات الفرح فى حياتى

يبقى معدود بالثوانى

ساعات بأحب اضحك

ساعات هاموت وابكى

وساعات من غير ملامح

لا انا عارفة افرح ولا عارفة اشكى

ساعات باتمنى اكون

انسان ملوش حدود

يروح بخياله بعيد

ويطير لابعد حدود

فى جزيرة هناك بعيد

يكون فيها وحيد

من غير انسان عليل

ولا حتى انسان عنيد

ساعات باحب الون

ساعات باحب اكون

من المكعبات بيوت

وساعات اهد البيت

واصرخ بعلو الصوت

ياريت أعود

ياريت يعود
احساسى تانى بالوجود
ياريت تعود
الضحكة تانى للخدود
ياريت تعود
البسمة لما اشوف ورود
ياريت اعود زى ما أنا
انسان بجد
انسان محب
انسان ميعرفش القلق
انسان خياله ملوش حدود
ياريت اعود
من تانى أعيش اليوم بيومه
ماشغلش بالى ببكرة وهمومه
ياريت أعود
ضحكتى تملا الوجود
ياريت أعود

الم

مبقاش حنين

مبقاش بيسأل ليه عليا

مش دة اللى كان بيحن ليا

مش دة اللى كان دايما يقول

انتى اول حب ليا

انتى اللى ياللى بسمتك

فتحت بيبان الدنيا ليا

انتى اللى ياللى ضحكتك

خلت حياتى تبقى عيد

خلتنى احب ايامى وسنينى اللى جاية

كل الكلام فى الدنيا ديه

ما يسوى كلمة قلتها

كل الدموع اللى فى عنيا

انت بايديك نزلتها

اوعدنى تنسى كل كلمة

من حبى ليك انا قلته

ا وانا برضة هانسى

كل حاجة فى هواك صدقتها

وحشتونى وحشتونى

وحشتونى ووحشنى البلوج

معرفتش اكتب الفترة اللى فاتت لظروف صحية ونفسية
الحمد لله على كل حال
فكرت اكتب فى كزا موضوع لكن لانى مش عارفة كل جوانب الموضوع فباتراجع دايما
مثلا كان فى ظواهر غريبة شوية فى مسلسلات رمضان
اولها :الكأبة الشديدة فى المسلسلات اللى شفتها
قلب ميت
شرف فتح الباب
فى ايد امينة
الدالى
كلهم حزن وكابة و ضرب
ثانيا :ظهور اكتر من ممثل او ممثلة فى اكتر من مسلسل
مثلا ايمن عزب وانا عن نفسى باحب تمثيله جدا ظهر فى :فى ايد امينة والدالى وهيمة
البنوتة اللى كانت خطيبة شريف منير فى قلب ميت هى اسمها نرمين
ظهرت فى مسلسل كمان بس مش متابعاه
شيرى مثلا ظهرت برضه فى كزا مسلسل
مش عايزة اطول لانى متابعتش كل المسلسلات ومش عايزة الخبط فى الكلام
كفاية كدة
بلاش اكئبكم معايا
سلاااااااااااااااااااااااااااااااام

رمضان جانا

السلام عليكم يا جميع زوار مدونتى

كل سنة وكلكم طيبين

ويارب رمضان السنة دى يكون احلى من اللى فاتت

ونقدر نغتم الحسنات الكتييييييييير اللى ربنا مدينا فرصة عشانها

ونحاول نقلل من السيئات اللى عندنا

كل سنة وانتم طيبين

دائما انت بقلبى

تقابلا كعادتهما, فى نفس المكان

وجلسا على نفس المقعد

فى ركن بعيد فى الحديقة

وكالعادة اطلعها على ما لديه من كتب

وعرض عليها قراءة ما تفضله

فاختارت رواية بعنوان ( حبيبى الى الابد)

وفتح هو الرواية وبدأ بقراءتها

وتسلل الى اذنيها صوته الهادئ الرقيق لكنه قوى وشجى

وجدت مشاعرها تذوب لتلتقى مع بطلة الرواية

وسرحت بخيالها تتصور انها الطلة وحبيبها البطل

وفجأة.....................

تنبهت من شرودها واخذت الرواية من يده واغلقتها

فأعرب عن دهشته من انها لا تريد ان تكمل الرواية التى اختارتها

فأخبرته بسر فعلتهاقالت له :لم نحتاج لقراءة قصص الحب ,فى حين اننا يمكن ان نكتب اجمل القصص عن حبنا ولم نحتاج ان نقرأ الشعر والزجل وكلامنا اجمل من كل الاشعار

واخرجت من حقيبتها ورقة وقلم وقالت: هيا بنا نكتب قصتنا

أخد منها الورقة والقلم وكتب اول كلمة ..............أحبك

أكملت هى ..........أعاهدك على الوفاء والاخلاص والحب

فأكمل ...................مالى احد سواك يا حبيبة القلب

وختمت هى القصة ب.....سأظل احبك مهما حدث ومهما تغربنا ومهما تعبنا فأنت بقلبى

كفاية بقى طيبة وسذاجة

الدنيا عمرها ما هتيجى على هواك

بطل تحلم وتقول ممكن

دايما الدنيا هتديك على قفاك

صدقنى الدنيا دى وحشة اوى

وكل ما فيها عذاب وهلاك

مش معنى كلامى انى مكتئبة ولا انى زعلانة

برغم انى عمالة باتكورث* بقالى فترة كبيرة

الحمد لله على كل حال

لكن الغرض من البوست دة انى احاول اغير نفسى

ابطل طيبة وهبل وسذاجة

افوق لنفسى وللناس اللى حواليا

مش كل حد اوصفه بانه طيب

مش كل مشكلة اعيط وماعرفش اواجهها

مش كل اما حد يضايقنى اسكت واكتم فى نفسى لحد ما اتعب

نفسى بجد اتغير

*باتكورث جت من كوارث ...يتكورث

ودة مصطلح جديد هاضيفه لقاموسى العجيب

ربنا يرحمك يا تيتا

تيتا اتوفت انهاردة الساعة تلاتة الفجر

انا اسفة ان كان بقالى كتير مش زرتك بس والله كنت بابقى مشغولة ساعة ما يروحوا لك او باكون نايمة

كمان احنا مش كنا بنيجى كتير عشان انتى عارفة بابا تعبان

صدقينى يا تيتا كنت باحبك يمكن مكنتش قريبة منك اوى لانى مش كنت باقعد معاكى كتير

لكن انتى عارفة لما جيتى عندنا كنت باحبك اوى

البيت كان كله حلو وانتى معانا

مكنتش باتخانق انا واخواتى خالص وكمان اختى مش كانت بتتعب

كمان بابا وماما كانوا مبسوطين اوى

كنتى بركتنا يا تيتا

عارفة يا تيتا لما جدو الله يرحمه مات زعلت اوى لانى كنت باحبه بس اللى صبرنى انك موجودة عشان تجمعينا فى بيتك

دلوقتى مين هيجمعنا

خايفة يا تيتا كل واحد يتشغل باللى عندة وننسى بعض اكتر ما احنا اصلا بعيد عن بعض

ماما لما راحت لك انهاردة قالت ان وشك كان زى البدر

وكنتى بتضحكى وتهزرى

كان نفسى اشوفك يا تيتا وكنت ناوية بكرة اجيلك

بس انتى سبقتينى

تيتا انا باحبك ومش عايزاكى تكونى زعلانة منى عشان مش كنت باجيلك

بس انا كنت باكلمك فى التليفون

عارفة انه مينفعش وانى كنت مقصرة بس سامحينى يا تيتا

تيتا ربنا يرحمك انتى كنتى طيبة اوى ومكنتيش بتزعلى حد خالص

الحب

الحب‏:‏ يولد في الشمس‏,‏ ينمو في القمر‏,‏ يعيش علي الارض‏,‏ يمرض بالقلب ويموت بالعقل‏!‏

احساس جديد

اتولد جوايا شئ

احساس بيحاول يعيش

احساس رغم كل شئ

نفسى انه ميتنسيش

احساس بحب

احساس بقلب

نفسه من زمان يعيش

لكن الحبيب محسنيش

خايفة يقول مبحبكيش

وارجع اعيش من غير امل

والدنيا يسكنها الملل

لكن الامل جوايا دايما له مكان

ان الأوان لازم يكون

ويكون لى قلب حبيب حنون

بحبه يملا عليا الكون

مش ينفع

مبقاش ينفع تيجى تسلم او تتكلم

مبقاش ينفع

لما اشوفك اكيد هاتألم ودة مش ينفع

طب كان ينفع

تبعد عنى وتنكر حبى

اوكان ينفع

تجرح روحى وتكسر قلبى

يبقى خلاص م الاخر مش ينفع

انى اسمع لك او اديلك فرصة تقوللى

لو كان ينفع دة كان زمان

انما خلاص دلوقتى مش ينفع

أجمل يومين فى عمرى

احلى حاجة لما تتجمع مع اصحابك وتعملوا حاجات انتوا بتحبوها مع بعض

او تعملوا حاجات لدرجة التهييس والجنان سوا

من يومين كانت حنة صاحبتى كان اخر يوم فى امتحاناتى زى ما بيقولوا خدونى على غفلة

المهم يادوب رجعت البيت غسلت وشى واكلت ساندوتش ونزلت رحت لها

ظبطنا الاغانى وعلينا صوتها اوى

ولما باقى اصحابنا جم

ابتدينا نغنى ونرقص ونسقف وعملت حاجات عمرى ما كنت عملتها

خلصنا يوم الحنة يادوب روحت البيت نمت

وصحيت تانى يوم شوية ورحنا لها عند الكوافير كانت سبقتنا مع اتنين اصحابنا

فضلنا هناك حوالى اربع ساعات

طبعا خارجين من هناك قمرات

الغريب بقى انى اعرف ان العريس بيروح يجيب العروسة من الكوافير

لا احنا غيرنا النظام

احنا اللى زفناها من عند الكوافير روحنا البيت عندها فى عربية صاحبتنا

وحصلت المعجزة وانا فى العربية

زغرطت

لأول مرة فى حياتى

تقريبا طلعت باعرف ازغرط

هى زغروطة مكسوفة وقصيرة بس يمكن عشان اول مرة

وكمان بازغرط فى الهيصة لما يكون حد بيزغرط انما لوحدى

لا يونكن ابدا

رجعنا بيتها وقعدنا شوية مع المعازيم قرايبها

وبعدين العريس وصل

لولولولولولولولوولوولوولولولولولولولولولولولولولولولى

نزلنا ركبنا العربيات ورحنا القاعة اللى فيها كتب الكتاب

ومن ثم تم عقد القران

وقد كانت العروسة فى ابهى صورها

وقد كنا حولها كالأميرات

بس خلاص سلمناها لعريسها وروحنا بيتنا

ربنا يسعدها يارب ويوفقها فى حياتها

الأخييييييييييير

خلصت امتحانات
مش مصدقة نفسى
الحمد لله الامتحان كان كويس وحليت كويس
ميرسى لكل الناس اللى دعت لى

الرابع

امتحنت المادة الرابعة

الحمد لله الامتحان كان كويس

باقى امتحان واحد

ياااااااااااااااااارب يعدى على خير

الثالث

الحمد لله على كل حال

امتحنت المادة الثالثة بس للأسف الشديد قبل ما اروح الامتحان كانت نفسيتى زى الزفت بسبب ظروف

ربنا يستر دعواتكم معايا

الثانى

الحمد لله امتحنت المادة التانية للسنة دى

لكنه تالت امتحان لأن كان معايا مادة من السنة اللى فاتت

الامتحان جه طويل جدا ورخم بس الحمد لله حليت على اد ما اقدر

ربنا يعدى الباقى على خير

الأول

الامتحان الاول عدى الحمد لله على خير
كانت مادة بشعة مميتة
كانت انتقام الرب على رأى اصحابنا
كانت مادة ملهاش ملامح رخمة جدا وطويلة جدا جدا
ودخلت اصلا الامتحان وانا سايبة فصلين بس للحق كنت ذاكرت مسألتين فى كل واحد
المهم انها عدت
وحسيت ان روحى رجعت
بعد ما كنت خلاص احلامى اتهدت
الحمد لله
عقبال الباقى

اعلان هااااااااااااااااام

تعتذر شركة الكهرباء عن انقطاع التيار لمدة لا تقل عن شهر وذلك لانشغال مهندسيها بامتحانات العملى والفاينل تيرم

على ان يعود التيار فى اقرب وقت ممكن

كما تشكر جميع عملائها على الردود والتعليقات الجميلة

وتناشدكم الشركة بالاكثار من الدعاء

ولكم جزيل الشكر

نتمنى لكم قضاء اسعد الاوقات فى حياتكم كلها

تهييس

البوست اللى فات قلت ان الحياة مش طويلة اوى عشان احزن فيها

ليه انا قلت كدة

لان دنيتى الى حد ما ماشية زى سلسلة بس الطرفين مش متوصلين يعنى لو حلقة وقعت الدنيا كلها بتضلم

وللأسف مباعرفش افصل بين احزانى

فلما بابقى متضايقة من حد او هو\هى متضايق منى بابقى زعلانة اوى وباقى الناس تفتكرنى زعلانة منها لانى ساعتها بابقى ضاربة بوز شبرين

فانا قلت انى مثلا لو زعلت من فلانة هاقعد اسبوع مثلا على ما اعدى الازمة النفسية دى

طب هو انا فاضل لى كم اسبوع مع الناس التانية

مثلا فى الكلية فاضل لى مع اصحابى شهرين تقريبا على ما نخلص المشروع ويا عالم بعده هاشوفهم تانى ولا لأ؟

عشان كدة هاحاول مازعلش حد ولا ازعل من حد لاحسن النور بيطفى والدنيا بتبقى وحشة اوى

ولأنى زى ما انا عارفة وممكن شوية منكم عارفين مهيسة جدا

بعد ما كنت زعلانة خالص بقيت فرحانة خالص

وانا مروحة من الكلية ماشية فى الشارع لقيت اللمبة نورت وانا بافرح جدا لما تنور والمرة دى مااسنيتش طلعت ورقة وقلم فى الشارع

وكتبت اللى جه فى بالى وكان منظرى تحفة الرجل اللى فى المحل بص لى باستغراب بيقول مين اللى واقفة مبتسمة جامد دى

لانى باعدى كل يوم من عنده بيشوفنى جد جدا وعاقلة اوى

بس انا ولا همنى فضلت واقفة لحد ما كتبت بعدها كنت مروحة البيت وانا فرحانة اوى

انا بنت بنت من العشق قصور

انا قلب قلب كل العقول

انا روح روح اللى ما عشقها

انا نور نور سكة العاشقين

Life is too short to it with anger

غلط

عرفت الحل
انى ماكلمش حد ومعرفش حد
طالما كل كلامى بيتفهم غلط

وكل تصرفاتى بتتفسر غلط
وطالما الناس عايزانا نعاملها غلط
وكل حاجة صح بيخلوها غلط
يبقى مش لازم اكلم حد
طالما اللى باحبه مش بيحبنى
واللى بيحبنى مش باحبه
وذنبنا احنا التلاتة اننا نعرف بعض
ودة بيعذبنا
يعنى عشان نعرف بعض هو دة الغلط
يبقى مش لازم اعرف حد
بس كدة انا هاعمل حاجة غلط عشان اصلح الغلط
لان مش ينفع اعيش من غير ما اكلم حد
ولا اعرف حد

كدةغلط

يعنى الدنيا كلها غلط

وبنعمل غلط فاكرين انه صح

ولما نعرف انه غلط وعايزين نصلحه

نعمل غلط تانى

واضح ان الدنيا كلها غلط

كذبت احزانى

أحزاني تكذب يا قلبي
ما عدت أصدق أحزاني
قالت: ستسير وتتركني

كالناس أردد ألحانى
وأعود لشعري عصفورا
بالحب يسافر وجداني
والدمع الحائر يتركني
والزمن الظالم ينساني
والحب يعود.. يظللني
يرعى الأحلام.. ويرعاني
لكن الحزن يطاردني
غيرت كثيرا.. عنواني
وبطاقة أسفاري شاخت
مزقها ليل الحرمان
يعرفني حزني.. يعرفني
ما أثقل حزن الإنسان
ما أقسى أن يولد أمل
ويموت بيأس الأحزان
ما أصعب أن نرضع حلما
يوما من ثدي البركان
فالنار تطارد أحلامي
من يخنق صوت النيران؟
من يأخذ من حزني عهدا
أن يترك يوما شطآني؟
أحزاني تكذب يا قلبي
ما عدت أصدق أحزاني
وهربت لعلي اخدعها
فوجدت لديها.. عنواني

لو اننا لم نفترق

من روائع الشاعر المصري الكبير فاروق جويدة قصيدة بعنوان "لو أننا لم نفترق" نقرأ منها :
لو اننا ...لم نفترق
لبقيت نجما في سمائك ساريا
وتركت عمرى في لهيبك يحترق
لو اننى سافرت في قمم السحاب
وعدت نهرا في ربوعك ينطلق
لكنها الاحلام تنثرنا سرابا في المدى
وتظل سرا.. في الجوانح يختنق
لو اننا .. لم نفترق
كانت خطانا في ذهول تبتعد
وتشدنا اشواقنا
فنعود نمسك بالطريق المرتعد
تلقي بنا اللحظات
في صخب الزحام كأننا
جسد تناثر في جسد
جسدان في جسد نسير .. وحولنا
كانت وجوه الناس تجرى كالرياح
فلا نرى منهم احد
مازلت اذكر عندما جاء الرحيل
وصاح في عينى الأرق
وتعثرت أنفاسنا بين الضلوع
وعاد يشطرنا القلق
ورأيت عمرى في يديك
رياح صيف عابث
ورماد أحلام .. وشيئا من ورق
هذا أنا...
عمرى ورق
حلمى ورق
طفل صغير في جحيم الموج
حاصره الغرق
ضوء طريد في عيون الافق
يطويه الشفق
نجم اضاء الكون يوما ... واحترق
لا تسألي العين الحزينه
كيف أدمتها المقل؟!
لا تسألى النجم البعيد
بأي سر قد أفل؟!
مهما توارى الحلم في عينى
وأرقنى الأجل
مازلت ألمح في رماد العمر
شيئا من أمل
فغدا ستنبت في جبين الأفق
نجمات جديده
وغدا ستورق في ليالي الحزن
ايام سعيده
وغدا أراك على المدى
شمسا تضئ ظلام أيامي
وان كانت بعيده
لو اننا لم نفترق
حملتك في ضجر الشوارع فرحتى
والخوف يلقينى على الطرقات
تتمايل الاحلام بين عيوننا
وتغيب في صمت اللقا نبضاتى
والليل سكير يعانق كأسه
ويطوف منتشيا على الحانات
والضوء يسكب في العيون بريقه
ويهيم في خجل على الشرفات
ماكنت اعرف والرحيل يشدنا
انى اودع مهجتى وحياتى
ماكان خوفي من وداع قد مضى
بل كان خوفي من فراق آت
لم يبقى شئ منذ كان وداعنا
غير الجراح تئن في كلماتى

تصحيح

تصحيح مهم جدا

كان لازم اكتبه من زمان

اغلب كلامى وحزنى على اصحابى او اللى كنت فاكراهم اصحابى

انما مش زعلى على حبيب سابنى او خدعنى

واذا كان كلامى عن الحب

فهو حب بخيالى باتخيل موقف باعيشه واكتب عنه

مليت

مليت من انى احب وماتحبش
مليت من انى اخاف وميتخافش عليا
مليت من انى انصح ومحدش يسمع
مليت من الكلام لانى مش بالاقى اجابة
مليت من الدموع لان محدش بيطبب
مليت من الكتابة لان محدش فاهم

من غير ليه

صباح الفل والورد و الياسمين

على أحلى عيون دايبين مشتاقين

متشوقين للحظة حنين

يرجعوا بعدها عطشانين

يشربوا من كاس الحب

ويعيشوا معاه طول السنين

مصر بجد لسة بخير

بجد مصر لسة بخير طالما فيها ناس كدة

امبارح ضاعت منى محفظتى فى الميكروباص وكان فيها كل كارنيهاتى وصورى وصور اصحابى

وكمان كان فيها 100جنية

طبعا كنت عمالة اعيط

وقالولى ممكن المحفظة ترجع لان محدش هيستفيد من الكارنيهات بس الفلوس استعوضى ربنا فيها

قلت مش مشكلة بس المهم البطاقة وكارنية الكلية

كان عندى الحمد لله ثقة بان ربنا هيخلينى الاقيها ومش هتضيع رغم ان اصحابى قالولى مش هتلاقيها

طبعا غير التريقة وتعالى نسلفك طب حد معاة بطاقة يضمنها ونلم من بعضينا ونروحها ......الخ

بعد ما روحت البيت وقلت لهم قالوا نروح نعمل محضر عشان البطاقة

رحت القسم بصراحة كان العسكرى والظابط قمة فى الذوق والاحترام وبجد خلصنا كل حاجة بسرعة تقريبا فى تلت ساعة

لما روحت اتمنيت ان مثلا السواق يكون لقاها وخلاها معاه وهيديهانى

بس انا عارفة ان خيالى واسع وصعب دة يحصل

نزلت تانى يوم الكليةوبادعى ربنا فى كل خطوة انى الاقيها

وصلت الموقف لقيت السواق جاى ناحيتى وبيقوللى اتفضلى المحفظة بتاعتك

وقاللى بصى فيها لاتكون حاجة ناقصة

وقاللى انه فضل مستنينى ولو مش كنت جيت كان هيجيبها البيت

طبعا انا كنت مش مصدقة اللى بيحصل وفرحانة جدا لانى لما كنت باقول لحد انى هالاقيها بكل ما فيها كان بس يقوللى ان شاء الله عشان يطمننى انما محدش مصدقنى

طبعا شكرت السواق جدا جدا بس من ذهولى نسيت انى المفروض اديله عشرة % من الفلوس

قلت خلاص بكرة

وانا مروحة لقيته فرحت اديلة الفلوس

مش رضى ياخده فضلت اتحايل عليه واقوله دة حقك برضة مش رضى

والله لو فى كمان شوية ناس زى دول اكيد بلدنا هتبقى احسن

ربنا يزيدهم ويحميهم ويبارك لكل حد كويس

كفاية نكد

نظرا لكثرة الاعتراضات من أعز الناس على النكد اللى بقيت فيه

ونظرا لانى ماقدرش ارفض لهم

دى شوية كلمات حاساها حلوة ونفسى انفذها

فسخت عقدى مع الهموم

قطعت جوابات النكد

طردت الدموع من العيون

وأنذرت الحزن بالهدد

باحلم ويحلالى

باحلم ويحلالى

باحلم وانا مالى

باللى هيحصل ايه؟

راضى انا بحالى

والهم ان جالى

انا مالى دعوة بيه

مانا عايش اهو فى حالى

من غير ما افكر فيه

ولا عندى عزيز غالى

فى يوم ازعل عليه

ولا حبيب حاسس بالتعالى

فى يوم اندم عليه

عيشتى بتحلالى

يلا وانا مالى

ايه تانى هابكى عليه؟

قلبى كان قصير الخيال

أخبرنى قلبى ذات مساء

انه سيحين موعد لللقاء

لذا يتعين على البقاء

الى ان يحين اللقاء

وانتظرت اللقاء

وانا فى شوق ولهفة

من سيكون القادم الذى سيستولى على قلبى وعقلى

وانتظرت كثيرا لكن ما تحقق شئ من كلام قلبى

فعدت اليه سائلة !!!

اين ما منيتنى به؟؟؟

فنصحنى بالنتظار والهدوء

حتى يحين الموعد المحتوم

وأخيرا تحقق ما منانى به قلبى

وحان الموعد المرتقب

استقبلته بفرحة غامرة وشوق السنين يعربد داخلى

وعدنى ان نكون اسعد حبيبين

وأجمل عاشقين

ونعمنا معا بالسعادة

وغرفنا من متع الحياة ما استطاعت يدانا

لكن قلبى كان قصير الخيال

لم يخبرنى أن السعادة مصيرها الى الزوال

فبعد سنين من السعادة والنعيم

حل مكانهم العذاب والجحيم

فمن هجر الى فراق

ومن لوعة الى اشتياق

حتى مات الحلم

بعدما احتكم الامر

أحسن عضو

من يومين بافتح المنتدى كان بقالى اسبوع تقريبا مدخلتش عليه عشان مشغولة فى المشروع
المهم دخلت
واذ فجأة
لقيت مكتوب احسن عضو
دراما كوين
طبعا مصدقتش نفسى
المنتدى فيه اكتر من 6الاف عضو
قول منهم على الاقل الف عضو نشطين
الجميل مش انى طلعت احسن حد
الجميل ان كل العدد دة من الناس حتى لو عشرة بس قالوا انى استحق احسن عضو
يعنى هما بيحبونى وبيحترمونى وشايفين ان دراما دى انسانة كويسة
طب وانا عايزة ايه من الدنيا تانى
غير ان الناس اللى حواليا تحترمنى وتحبنى
ولما تيجى سيرتى يقولوا دى انسانة كويسة
فرحت جدا جدا لما لقيت اسمى
يارب دايما افضل عند حسن ظن الناس بيا
ويارب لو حد زعلان منى او شايل منى فى حاجة
مش يزعل منى خالص ويفتكرنى بالخير

وأنا فى حضنك

أغنية مفيش أجمل منها اتغنت فى اجمل يوم وغناها احن واجمل حد

انت ومش حد تانى

فى عنيك فرحة زمانى

لو غبت حبيبى بس ثوانى

مابعرفش اعمل ايه

جوايا حنين باقى لك

لو أطول فى عنيا اشيلك

الدنيا بتحلى لما بأجى لك ودة اللى باحس بيه

انا ليه وانا فى حضنك باتخطف

دة بايه يتسمى ويتوصف

روحى بتنسانى وشوقى يملانى واروح لبعيد

انا ليه وانا فى حضنك باتخطف

دة بايه يتسمى ويتوصف

بقى للدرجة دى هوانا مش عادى وكدة بيزيد

راحة نفسية شديدة

اولا

اعتذر لكل الأصقاء اللى سببت لهم ألم من البوست اللى فات

وأشكرهم كتيييييييييييييير اوى على مشاركتهم وكلامهم الجميل

ثانيا

الحمد لله

انا مرتاحة جدا جدا دلوقتى

ليه؟

لأن يوم عيد الحب قضيته مع احب انسانة لقلبى

أية حبيبتى

مستغربين ليه مش عيد الحب دة لكل الناس

خلاص انا باحب صاحبتى

جت لى الكلية وكان يوم جميل اوى اوى

تانى حاجة بقى

انى كبرت دماغى

وحاولت انفذ كل النصايح اللى سمعتها عشان مازعلش نفسى ولا ازعل على حد

وفعلا جارى التنفيذ

والخطوط العريضة للخطة المستخدمة

اولا

أنفض للى ينفض لى

ثانيا

اللى عايزنى يجى لى انا مابروحش لحد

ثالثا

اللى باعك بيعه واشترى بتمنه قرطاس لب

رابعا

الدنيا مبتديش حد اللى هو عايزة

خامسا

متديش حد اكتر من حجمه عشان ميسوقش فيها

وعلى رأى هشام عباس

سيبها هتحبك يا قلبى

حبها تسيبك

هى دى حبيبتك يا قلبى

وهو دة نصيبك

وأخيرا

الحمد لله الحمد لله

على الناس الطيبين الكويسين اللى معايا وربنا يخليهم ليا

شئ غير عادى

لما تبكى على موت انسان

عادى شئ طبيعى جدا

بيحصل مليون مرة فى حياتك

ولما يكون الانسان دة قريب منك

هتفضل ذكراه فى بالك فترة طويلة

ودة عادى

انما اللى مش عادى

لما اللى يموت دة يبقى انت

ياترى هتعمل ايه؟؟؟

لما تهون عليك نفسك لدرجة انك خلاص مش باقى حاجة تعيش عشانها

اذا كانت اكبر حاجة او اللى كنت فاكرها اكبر واغلى حاجة تضيع لسبب تافه جدا

وبرغم كل حاجة عملتها عشانها برضة تستمر فى رحلة الضياع

يبقى اعتقد ملهاش لزمة العيشة

بس دايما بيفضل ناس ممكن يكونوا عننا بعيد

لكن مكانهم فى القلب اكيد

واكيد عمر ما هتغيرهم ظروف

لانهم لما عرفوك

عرفوك فى زمن البراءة الجميل

الزمن الذى ولى وانتهى

الناس دول هما اصحابى

من ايام ثانوى

ربنا يخليهم كلهم ليا

ويصبرنى على بعدهم عنى

ويخلى لى الناس الطيبين

حبك مطر

طب هتصدقنى ان قلت لك

حبى اكبر كتير من حبك

ولا هتصدق ان قلبى حاسس نبض قلبك

أو ان مشاعرك واصلة ليا

ساكنة روحي

مالكة منى كل حتة فيا

لو كان انا حبى مطر

فحبك هو المحيط

الحاوى لكل الشوق والحنين

الجامع زمام كل المحبين

العاشقين

الولهانين

الراجين من الدنيا انها فى لحظة تستكين

تبطل شقلبظات وحركات مجانين

انت الأصل لكل المشاعر والبحور

انت الأمل فى زمان غلب عليه الفتور

شوية حب

عندى غالى

وما أقدر أدارى

حنينى لك

يا كل عمرى بأشتاق اليك

وأنت معايا

وأنت بعيد

حبك جوا قلبى أكيد

وأنت قريب

وأنت بعيد

هتفضل فى قلبى

حبيبى الوحيد

دايما ظالمينها معانا

ظالمينها ليه

دة العيب فى الناس

بنقول بقت وحشة

والناس ملهاش احساس

اتارى العيب مننا

احنا اللى نسينا اصلنا

نسينا اللى فطرنا عليه ربنا

غاب عننا

ان الانسان اصله طيبة

اصله حنان

عمر ما تطلع منه العيبة

عمره ما يخون لانه انسان

بيحب الخير لكل الناس

والصدق فيه هو الاساس

بعد دة كله ما غاب عننا

برضة ظالمين الحياة

ونقول العيب فيها

لا ابدا دة العيب مننا