خلال رحلة البحث عن شخصيتى الحقيقية او كيانى
اكتشفت ان عندى شخصيتين
الشخصية الاولى ودى فى البيت مع بابا وماما واخواتى
ودى بنوتة خجولة جدا وحساسة وكتومة وزى البسكوتة وملهاش فى اى حاجة غير المزاكرة والمطبخ وصاحباتها
بتحترم كل الناس بغض النظر عن انها بتحبهم او لا
والشخصية التانية هى الاحسن بالنسبة الى باحبها اكتر
ودى بنوتة اجتماعية جدا دمها خفيف الى حد ما
بتحب كل الناس اللى حواليها
بتحب اصحابها وزمايلها اوى وشايفة انهم بجد اخوات ليها وتقدر تعتمد عليهم
ليها مدونة ومشتركة بمنتديات كتير وعلى الفيس بوك
بتكتب خواطر واغانى
بتقرا شعر وروايات رومانسية واجتماعية
بمعنى تانى
عندها حياة
تعرف ناس كتير اوى
والحمد لله ناس كتير منهم بيثقوا فيها وبيأتمنوها على اسرارهم
بس برضه فى حدود عندها لكل حاجة حتى الكلام
بتحاول متعملش حاجة غلط عشان احترامها لنفسها ولاهلها
المشكلة ان الشخصية التانية مخفية عن الناس الاولانيين
لانهم عملوا مشاكل لما عرفوا جزء من حياتها التانية
بس انا تعبت
تايهه بين الاتنين
بين اللى باحبة ومش مفروض اعمله
واللى باكرهه ومفروض عليا
عشان كدة قررت اتخلى عن شخصية من الانتين
هاتخلى عن التانية
بس عايزة اقول لكل حد عرفته
انا باحبك اوى اوى اوى
وانت بجد كنت حد مميز فى حياتى
وارجو محدش يزعل منى ابدا ابدا
8 comments:
الشخصيتين هايلين
ربنا يسعدك دايما
دمتى بكل الود
فى حفظ الله
تقبلى مرورا اولا
بس ممكناقول انى شايف ان الاتنين مش متناقضين اصلا بالعكس دول بينهم تكامل ايجابى جدا
يعنى اعتقد انه مش ضرورى خالص تتخلى عن واحده فيهم
ارق تحيه
تمام كدا
بس الشخصيه الأولى مش وحشه
الجميل ان يكون لكل مقام مقال
ولكل موقف شخصيته الى تناسبه
عموما
انتى حد جميل باى حال
بيا ن رقم 1
بيان تأسيس العصابة
يشرفني انا الاستاذ / حرامي لص نشال
ان اعلن لكم عن تأسيس اول عصابة لسرقة المدونين
واحب اعرفكم اني خلاص بقي عندي عصابتي
واسلحتي ومفاتيحي وطفاشتي واعلن لكم جميعا عن ميثاق الشرف لتأسيس هذه العصابه
ويتضمن المواد الدستوريه التالية
1- ان لا يتم سرقة الا ما هو نفيس وغالي وعلي المدونين اللي أي كلام انهم يتطمنوا لاني مش هقرب ناحيتهم
اما المدونين المتميزين فيعرفو اني هسرقهم هسرقهم
2- اي عملية سرقة او سطو مسلح لن تتم الا بعد التهديد والوعيد يعني هبعت رساله للزبون اقوله اني نويت اسرقه
3- يتم ترك بصمات(تعليق ) علي كل مدونه تمت سرقتها عشان تعرف انها اتسرقت
4- يتم عمل نقطة بوليس (عندي في المدونه ) لتلقي البلاغات والشكاوي والتعليقات
5- لن يتم نشر اي موضوع الا اذا كان مسرووووق يعني انا مش هكتب حاجه من عندي
6- ان جيت في يوم واتقفشت فسوف اعلن توبتي وابطل سرقه واحل العصابه
وعشان تقفشني لازم تعرف اسم المدونة الاصليه بتاعتي اللي هيه مش سرقه يعني
- يتم نشر هذا البيان علي اكبر عدد ممكن من المدونات للعلم فقط
اعلانات مبوبه
اعلان لكل الجرايد الرسميه والغير رسميه
مطلوب مساعدين لحرامي.... علي ان يكونوا خبره لا تقل عن عام في السرقه والنصب والتدوين وعلي من يرغب في التقدم للوظيفه ارسال cv وصورتين او تعليقين
امضاء
الحرامي الكبير
ايه لكلام الغريب دا
.
.
شوفي انت لما قارنتي بين الشخصيتين اتكلمتي عن الاولي في كام سطر والتانية في كام سطر ؟؟
.
.
معقولة لما تتخلي تتخلي علي التانية ؟؟؟؟؟
ليه ياعني وايه المقابل ؟؟؟
لسه فيه كلام
اختى العزيزة / دراما
بجد كلام كتير جوايا عاوز اقولهولك بس مش عارف ابتدى منين
يمكن يكون اللى انتى عاوزة تعمليه ده مترتب على انك مش قادة توجهي الظروف
الظروف اللى ياما انتى ساعدينى انى اوجهها
كل واحد فينا ليه اكت من شخصية وبصفة عامة بتبقى شخصية جوه البيت وشخصية بره البيت وكل وحدة فيهم بتكون منفصلة تماما عن التانية بس بيكونوا منبثقين من المبادئ اللى اتربينا عليها وعادات مجتمعنا وفي الشخصيتين اللى انتى اتكلمتى عليهم مفهمش حاجة تخليك تتخلى عن واحدة فيهم بل بالعكس انتى المفروض تتمسكى بيهم اكتر بس لاداعى للاسراف في الاعتماد على الناس دى النقطة اللى ممكن تكون مشتتاك وتعباك انما غير كده الموضوع بينتهى في كلمتين لازم يكون عندك رأيي وارادة مستقلين في حياتك انتى لانك انتى بتعيسيهم مش حد غيرك ولازم تقعدي مع نفسك وترتبى اوراقك وافكارك صح وبعد كده تعرضيهم على اهلك وتقنعيهم بيه وتوصلوا لحل وسط خاصة وانك بنت
وانتى عارفه نظرة الاهل والمجتمع ازاى بتبقى للبنت بتتحجم كل حاجة في حياته ودى مش غلط وبرضه مش صح بس اللى يقدر يوصل لحل يرضى الطرفين
لعل كلامى يكون افاد
بالغم انه مش كلامى ده كلامك انتى اللى ياما نصحتينى بيه
واتمنالك كل سعادة وراحة بال
اخوك / احمد حسنى محمد طه
دراما....انا شايفه ان الشخصية التانية احلى
بقالى كتير ممرتش عالمدونة ....بس اهو انا رجعت تاني
:)
Very good!
Post a Comment