Saturday, June 21, 2008

أجمل يومين فى عمرى


احلى حاجة لما تتجمع مع اصحابك وتعملوا حاجات انتوا بتحبوها مع بعض

او تعملوا حاجات لدرجة التهييس والجنان سوا


من يومين كانت حنة صاحبتى كان اخر يوم فى امتحاناتى زى ما بيقولوا خدونى على غفلة

المهم يادوب رجعت البيت غسلت وشى واكلت ساندوتش ونزلت رحت لها

ظبطنا الاغانى وعلينا صوتها اوى

ولما باقى اصحابنا جم

ابتدينا نغنى ونرقص ونسقف وعملت حاجات عمرى ما كنت عملتها

خلصنا يوم الحنة يادوب روحت البيت نمت

وصحيت تانى يوم شوية ورحنا لها عند الكوافير كانت سبقتنا مع اتنين اصحابنا

فضلنا هناك حوالى اربع ساعات

طبعا خارجين من هناك قمرات

الغريب بقى انى اعرف ان العريس بيروح يجيب العروسة من الكوافير

لا احنا غيرنا النظام

احنا اللى زفناها من عند الكوافير روحنا البيت عندها فى عربية صاحبتنا

وحصلت المعجزة وانا فى العربية

زغرطت

لأول مرة فى حياتى

تقريبا طلعت باعرف ازغرط

هى زغروطة مكسوفة وقصيرة بس يمكن عشان اول مرة

وكمان بازغرط فى الهيصة لما يكون حد بيزغرط انما لوحدى

لا يونكن ابدا

رجعنا بيتها وقعدنا شوية مع المعازيم قرايبها

وبعدين العريس وصل

لولولولولولولولوولوولوولولولولولولولولولولولولولولولى


نزلنا ركبنا العربيات ورحنا القاعة اللى فيها كتب الكتاب

ومن ثم تم عقد القران

وقد كانت العروسة فى ابهى صورها

وقد كنا حولها كالأميرات

بس خلاص سلمناها لعريسها وروحنا بيتنا


ربنا يسعدها يارب ويوفقها فى حياتها

Thursday, June 19, 2008

الأخييييييييييير

خلصت امتحانات
مش مصدقة نفسى
الحمد لله الامتحان كان كويس وحليت كويس
ميرسى لكل الناس اللى دعت لى

Monday, June 16, 2008

الرابع

امتحنت المادة الرابعة
الحمد لله الامتحان كان كويس
باقى امتحان واحد
ياااااااااااااااااارب يعدى على خير

Thursday, June 12, 2008

الثالث

الحمد لله على كل حال
امتحنت المادة الثالثة بس للأسف الشديد قبل ما اروح الامتحان كانت نفسيتى زى الزفت بسبب ظروف
ربنا يستر دعواتكم معايا

Monday, June 9, 2008

الثانى

الحمد لله امتحنت المادة التانية للسنة دى
لكنه تالت امتحان لأن كان معايا مادة من السنة اللى فاتت
الامتحان جه طويل جدا ورخم بس الحمد لله حليت على اد ما اقدر
ربنا يعدى الباقى على خير

Monday, June 2, 2008

الأول

الامتحان الاول عدى الحمد لله على خير
كانت مادة بشعة مميتة
كانت انتقام الرب على رأى اصحابنا
كانت مادة ملهاش ملامح رخمة جدا وطويلة جدا جدا
ودخلت اصلا الامتحان وانا سايبة فصلين بس للحق كنت ذاكرت مسألتين فى كل واحد
المهم انها عدت
وحسيت ان روحى رجعت
بعد ما كنت خلاص احلامى اتهدت
الحمد لله
عقبال الباقى