Sunday, November 30, 2008

اى دمعة حزن لااااااااااا




مش عايزة الحزن تانى
يملا كل الاغانى
انا عايزة الفرحة دية
تبقى فى كل المعانى
مش عايزة اشوف دموع
قلب فى يوم اتجرح
ولا عايزة اشوف ملامح
قلب من شوقه اتوجع
انا عايزة الكل يفرح
عايزة الكل يرقص
عايزة الكل ينسى ...انه مرة اتجرح
يرجع يعيش حياته
ينسى كل اللى فاته
ويدور على اللى يخلى قلبه ينشرح
يدور بين جيرانه
يدور بين صحابه
واكيد فى يوم هيلقى
اللى يطيب ألامه
ومن تانى هارجع اقول
انسى اللى فاتك
عيش حياتك
وامسح الالم من ذكرياتك

Sunday, November 23, 2008

ساعات


ساعات احب اعيش

وساعات الدنيا متهمنيش

وساعات الفرحة متسبنيش

وساعات الحزن مينسانيش

ساعات الحب يملانى

وساعات الجرح ينسانى

وساعات الفرح فى حياتى

يبقى معدود بالثوانى

ساعات بأحب اضحك

ساعات هاموت وابكى

وساعات من غير ملامح

لا انا عارفة افرح ولا عارفة اشكى

ساعات باتمنى اكون

انسان ملوش حدود

يروح بخياله بعيد

ويطير لابعد حدود

فى جزيرة هناك بعيد

يكون فيها وحيد

من غير انسان عليل

ولا حتى انسان عنيد

ساعات باحب الون

ساعات باحب اكون

من المكعبات بيوت

وساعات اهد البيت

واصرخ بعلو الصوت

Wednesday, November 12, 2008

ياريت أعود


ياريت يعود
احساسى تانى بالوجود
ياريت تعود
الضحكة تانى للخدود
ياريت تعود
البسمة لما اشوف ورود
ياريت اعود زى ما أنا
انسان بجد
انسان محب
انسان ميعرفش القلق
انسان خياله ملوش حدود
ياريت اعود
من تانى أعيش اليوم بيومه
ماشغلش بالى ببكرة وهمومه
ياريت أعود
ضحكتى تملا الوجود
ياريت أعود

Sunday, November 2, 2008

الم

مبقاش حنين
مبقاش بيسأل ليه عليا
مش دة اللى كان بيحن ليا
مش دة اللى كان دايما يقول
انتى اول حب ليا
انتى اللى ياللى بسمتك
فتحت بيبان الدنيا ليا
انتى اللى ياللى ضحكتك
خلت حياتى تبقى عيد
خلتنى احب ايامى وسنينى اللى جاية
كل الكلام فى الدنيا ديه
ما يسوى كلمة قلتها
كل الدموع اللى فى عنيا
انت بايديك نزلتها
اوعدنى تنسى كل كلمة
من حبى ليك انا قلته
ا وانا برضة هانسى
كل حاجة فى هواك صدقتها