أحكى

ليه وياك تتعبنى

ليه بتسيبنى لوحدى افكر مالك

ليه دايما تسكت قدامى

احكى يا قلبى مين ليك غيرى

احكى وقولى هاخفف عنك

عايزة ارغى

حاسة بانتعاش

فاكرين اعلان اخيرا زست

مبسوطة الحمد لله

بيتهيألى عايزة ارغى كتير

انهاردة جبت صورة المدرسة واحنا فى 2 ابتدائى

وحطيتها على الفيس بوك

فاكرة كل البنات ماعدا 2 او 3

وفاكرة 3 ولاد

واحد منهم جارى

والتانى ابن صاحبة ماما

والتالت

كنت اعرفه هو واخته وكانوا من السعودية

لقيت انه فريند عند واحدة كانت معانا فى الصورة وهى فريند عندى من فترة

بافرح اوى لما افتكر زمان

والاقى حد كمان من زمان

يارب الاقى البنوتة اللى نفسى اعرف اى حاجة عنها

هى اسمها سارة

ادعولى الاقيها

لانى ساعتها هابقى مبسوطة جدا

أيه اللى حصل لى ؟؟؟؟؟؟؟

حاجات غريبة بتحصل لى

بانسى كتير جدا

وبسرعة للأسف

دة بيحطنى فى مواقف محرجة

بانسى الصبح انى عايزة امشى فى الطريق دة عشان اعرف اركب بسرعة واروح الشغل

مش بافتكر غير وانا خلاص باعدى الشارع

بانسى الكلام العادى اللى بنقولوا فى المواقف اللى ممكن تحصل كل يوم

غير الصداع اللى بقاله فترة

غير النوم الكتير

بقالى اسبوع او اكتر بانام كتير جدا

المشكلة فى كل دة ان مفيش حاجة شاغلانى غعشان اكون متلغبطة جدا كدة

يعنى مفيش مشاريع بنعملها ولا حاجة باشتغل فيها بالعكس الشهر اللى فات كان اسوء شهر فى عدد المشاريع اللى طلعت من المكتب

عايزة اعرف مالى لانى قربت اتجنن

حاسة انى بقيت انطوائية مع انى رغاية موت

حاسة انى مش باعمل حاجة مفيدة لنفسى

حتى الشكولاته بقالى كتير مش اكلتها

بطلت اكتب مع انى بارتاح لما اكتب حتى لو كلام عادى كدة مع نفسى

اتغيرت ومش عارفة السبب

عايزة ارجع زى ما كنت بس مش اوى زى ما كنت

ايديا بتجرى على الحروف مش عارفة تكتب ايه ولا ايه؟

الكلام تايه

ومتلغبط

وكتير

تعبانة

افكار غير منظمة

احاسيس متضاربة

كلمات تائهة ....تسعى جاهدة للخروج لكن شئ ما يمنعها

الفيل مش بيخاف من الفار

تصدقوا انى بعد 23 سنة ونصف عرفت ان الفيل مش بيخاف من الفار زى ما دايما كنا بنشوف

امبارح كنت فى المكتب وكان ابن البشمهندس معانا (هو فى 2 ابتدائى) وكان عمال يحكى عن حاجات وبيقول لنا ان الفيل والفار اصحاب

قلت له لا الفيل بيخاف من الفار

محدش صدق

لا طمطم ولا زيزا ولا هو

قلتلهم بجد والله مش فاكرين سندريلا الجزء التانى لما خوفوا الفيل بالفار اللى هو صاحب سندريلا

وكمان واحنا صغيرين كان عندنا فى كتاب الانجليزى تقريبا بتاع سنة تانية او تالتة ابتدائى قصة كدة

ان ملك كان بيحب الجبنة الرومى عشان كدة كان القصر فى فيران بتاكل منه الجبنة

فعشان يخوف الفيران جاب قطط لكنها ضايقته

فعشان يمشيها جاب لها كلاب

بس اتضايق برضه

فجاب اسود عشان الكلاب تمشى

بس طبعا كان خايف منها عشان كدة جاب لها فيله عشان تمشى

فبقت الفيله هتهد القصر

فعشان يمشيها جاب لها فيران تانى

وعادى بقى عاشوا مع بعض وقسموا الجبنة

مش مشكلتنا الجبنة مشكلتنا انهم علمونا ان الفيل بيخاف من الفار ودة مش صح

لما لقيتهم مش مصدقين دورت فى الوكيبيديا لقيت ان الفيل مش بيخاف من الفار كما يعتقد الناس

والموضوع خلص على كدة

بس بالنسبة لى مش خلص

معنى اللى حصل انهم بيعلمونا غلط والله اعلم علمونا ايه غلط تانى

رحت المعرض هييييييييييييييييه

رحت المعرض يوم الخميس بعد الشغل

الطريق كان واقف جدا عشان تذاكر حفله عمرو دياب فى الاستاد

بس الحمد لله وصلنا

مخدناش وقت كتير كنا عارفين هنجيب ايه

كنت انا وزيزا وطمطم

انا جبت قصص زهور

وجبت الجنس الثالث ليوسف ادريس

وجبت طبعا كتاب لوصفات الاكل

السنة اللى فاتت شفت د/ نبيل فاروق

كان نفسى السنة دى اشوفه

يلا حصل خير

مبسوطة كتير انى رحت المعرض

كدة بقالى 12 سنة باروح مفوتتش غير مرة واحدة كان اخويا فيها تعبان

اصل عيب عليا اوى الناس تيجى للمعرض من محافظات تانية وانا اللى بينى وبينه شارع ماروحش

دى اخر اخباراتى

وعندى حاجات كتير والله عايزة اتكلم فيها بس كسل معلش

سلاماااااااااااااااااااات

وحشتونى

وحشتونى جدا جدا

الحمد لله الدنيا ماشية

وادينى باحاول اعديها

حصلت حاجات مش حلوة خالص الشهر دة

بس الحمد لله ربنا قوانى

ربنا ما يعيد المشاكل دى تانى

بقالى كتير مكتبتش

كان نفسى اكتب حاجة حلوة

لكن الالهام منقطع بقاله فترة

ادعولى ماما تفك الجبس انهاردة

اه

اه لو ينفع منقولش اه

لو نقدر نخلى عيودنا متدمعش

ولو دمعت دموعنا متلمعش

اه او نقدر