تصدقوا انى بعد 23 سنة ونصف عرفت ان الفيل مش بيخاف من الفار زى ما دايما كنا بنشوف
امبارح كنت فى المكتب وكان ابن البشمهندس معانا (هو فى 2 ابتدائى) وكان عمال يحكى عن حاجات وبيقول لنا ان الفيل والفار اصحاب
قلت له لا الفيل بيخاف من الفار
محدش صدق
لا طمطم ولا زيزا ولا هو
قلتلهم بجد والله مش فاكرين سندريلا الجزء التانى لما خوفوا الفيل بالفار اللى هو صاحب سندريلا
وكمان واحنا صغيرين كان عندنا فى كتاب الانجليزى تقريبا بتاع سنة تانية او تالتة ابتدائى قصة كدة
ان ملك كان بيحب الجبنة الرومى عشان كدة كان القصر فى فيران بتاكل منه الجبنة
فعشان يخوف الفيران جاب قطط لكنها ضايقته
فعشان يمشيها جاب لها كلاب
بس اتضايق برضه
فجاب اسود عشان الكلاب تمشى
بس طبعا كان خايف منها عشان كدة جاب لها فيله عشان تمشى
فبقت الفيله هتهد القصر
فعشان يمشيها جاب لها فيران تانى
وعادى بقى عاشوا مع بعض وقسموا الجبنة
مش مشكلتنا الجبنة مشكلتنا انهم علمونا ان الفيل بيخاف من الفار ودة مش صح
لما لقيتهم مش مصدقين دورت فى الوكيبيديا لقيت ان الفيل مش بيخاف من الفار كما يعتقد الناس
والموضوع خلص على كدة
بس بالنسبة لى مش خلص
معنى اللى حصل انهم بيعلمونا غلط والله اعلم علمونا ايه غلط تانى
5 comments:
يعنى هيا جت على قصه الفار و الفيل
اللى غلط
يا حبيبتى احنا كل العلام اللى اتعلمناه غلط فى غلط
و عاااااااادى جدا
متخديش فى بالك انتى بس
حمد الله على السلامه
يانهار اسووود
متفكرنيش بالتعليم بقى
يعني هو كله صح وجت علي الفيل
اااااااه يااااااااانى
وحشانى ياعثل
انت جيي علي ده ووقفتي
انا افتكر انه في التاريخ كانت فيه تواريخ كتيره غلط
وبعدين كله كوم وماده العلوم كوم تاني
كل سنه ندرس قانون ونظريه ونفضل طول السنه نحفظ فيها نيجي للسنه اللي بعدها نلاقيهم بيقولوا لنا انسوا اللي اتعلمتوه وصفحه جديده ومن اول السطر وناخذ نظريات تلغي كل اللي حفظناه في السنه اللي فاتت وعادي يعني
الاول حمدلله على السلامة بعد الغياب دة
بالنسبة لموضوع البوست .. اتعلمنا حاجات غلط كتير وعلشان ماتتعبيش ماتعديش
Post a Comment