مصر بجد لسة بخير

بجد مصر لسة بخير طالما فيها ناس كدة

امبارح ضاعت منى محفظتى فى الميكروباص وكان فيها كل كارنيهاتى وصورى وصور اصحابى

وكمان كان فيها 100جنية

طبعا كنت عمالة اعيط

وقالولى ممكن المحفظة ترجع لان محدش هيستفيد من الكارنيهات بس الفلوس استعوضى ربنا فيها

قلت مش مشكلة بس المهم البطاقة وكارنية الكلية

كان عندى الحمد لله ثقة بان ربنا هيخلينى الاقيها ومش هتضيع رغم ان اصحابى قالولى مش هتلاقيها

طبعا غير التريقة وتعالى نسلفك طب حد معاة بطاقة يضمنها ونلم من بعضينا ونروحها ......الخ

بعد ما روحت البيت وقلت لهم قالوا نروح نعمل محضر عشان البطاقة

رحت القسم بصراحة كان العسكرى والظابط قمة فى الذوق والاحترام وبجد خلصنا كل حاجة بسرعة تقريبا فى تلت ساعة

لما روحت اتمنيت ان مثلا السواق يكون لقاها وخلاها معاه وهيديهانى

بس انا عارفة ان خيالى واسع وصعب دة يحصل

نزلت تانى يوم الكليةوبادعى ربنا فى كل خطوة انى الاقيها

وصلت الموقف لقيت السواق جاى ناحيتى وبيقوللى اتفضلى المحفظة بتاعتك

وقاللى بصى فيها لاتكون حاجة ناقصة

وقاللى انه فضل مستنينى ولو مش كنت جيت كان هيجيبها البيت

طبعا انا كنت مش مصدقة اللى بيحصل وفرحانة جدا لانى لما كنت باقول لحد انى هالاقيها بكل ما فيها كان بس يقوللى ان شاء الله عشان يطمننى انما محدش مصدقنى

طبعا شكرت السواق جدا جدا بس من ذهولى نسيت انى المفروض اديله عشرة % من الفلوس

قلت خلاص بكرة

وانا مروحة لقيته فرحت اديلة الفلوس

مش رضى ياخده فضلت اتحايل عليه واقوله دة حقك برضة مش رضى

والله لو فى كمان شوية ناس زى دول اكيد بلدنا هتبقى احسن

ربنا يزيدهم ويحميهم ويبارك لكل حد كويس