Wednesday, September 30, 2009

درس في الحياة عمرك ما هتتعلمهم في المدرسة11

بيل جيتس الأسطورة كان في زيارة لمدرسة ثانوي واحب انه يعلم طلبة المدرسة 11 قاعدة مهمة من قواعد الحياة عمرهم ما هيلاقوها في الكتب ولا هيتعلموها في المدرسة.

القاعدة الاولى
ان الحياة مش دايما بتكون عادلة ولازم نتعود على كده.

القاعدة الثانية
لن يهتم العالم لأمرك ولن يتقبل انجازك لأي شئ ان لم تكن تشعر بالقبول والتقدير لذاتك أولا.

القاعدة الثالثة
لن تتقاضى اجر يساوي 60الف دولار في السنة بمجرد انتهاءك من الدراسة ولن تكون نائب للرئيس وتملك سيارة بتليفون
حتى تجتهد وتتعب كثيرا فسوف تحتاج لسنوات عديدة لتصل لذلك.

القاعدة الرابعة
لو كنت تعتقد ان مدرسك صعب التعامل معه انتظر حتى ترى رئيسك في العمل.

القاعدة الخامسة
العمل بالوظائف الدنيا مثل بيع البرجر مش بيقلل من كرامتك ، اجدادك كانوا بيسموها فرصة.

القاعدة السادسة
لو غلطت مرة وانت صغير ، اعرف ان دي مش غلطة اهلك ، متعلقش اخطائك على شماعة غيرك واتعلم منها.

القاعدة السابعة
قبل ما تتولد أبوك وامك مكانوش مملين زي دلوقتي، هما بقوا مملين لانهم مضطرين يدفعوا فواتيرك وينضفوا لبسك ويسمعوا مدحك لنفسك فقبل ما تحاول تحمي العالم من شرور الاجيال السابقة جرب تنضف أوضتك الاول.

القاعدة الثامنة
في المدرسة مفيش كسبان وخسران لكن في الحياة فيه طبعا، في المدرسة بيدوك فرص كتيرة عشان تنجح وتجاوب الاجابة الصح لكن ده لا يمت بصلة باختبارات الحياة الحقيقية.

القاعدة التاسعة
الحياة مش مقسومة فصول دراسية وبعد التخرج عمرك ما هتاخد اجازة صيف،ومحدش من رؤسائك هيكون مهتم انك تلاقي نفسك وتحدد هدفك، لازم تعمل ده بنفسك في وقتك الخاص بعيدا عن وقت الشغل.

القاعدة العاشرة
التليفزيون مش شبه الحياة ، في الحياة الحقيقية الناس لازم يسيبوا الكوفي شوب ويروحوا الشغل.

القاعدة الحادية عشر
خليك لطيف مع الاولاد الشاطرين في فصلك ، لان ممكن جدا ينتهي بيك الأمر بتشتغل عند واحد منهم
بيل جيتس حاول ينقل خبرته في القواعد دي، انت كمان انقل لنا خبرتك من الحياة في قاعدة .. تساعدنا وتساعدك .. وتخلينا نتعلم من بعض

Sunday, September 27, 2009

انا غنية اوى اوى


يوم الخميس 24-9-2009


كانت خطوبتى

الحمد لله كانت جميلة جدا

حسيت اد ايه اصحابى بيحبونى واهلى

والاهم انى عرفت ان ربنا بيحبنى لان كل حاجة الحمد لله كانت كويسة اوى

يومها كان كل اصحابى معايا وكانوا اكتر من اخواتى

شيماء جت لى الصبح ظبطنا الشقة والزينة وظبطنا الفستان والحاجة اللى هناخدها واحنا رايحين الكوافير

وبعدها هبة وشيماء راحوا معايا للكوافير وجت لنا نهى ودعاء

خلصنا وبعدها جه مصطفى واخويا واخوة ووالده

وحنا البيت

لقيتهم كلهم مستنيننى

الحمد لله قالولى انى امورة وفستانى حلو

واليوم بجد كان جميل وحصل شوية مواقف توقع من الضحك

يارب تفضل دايما الايام حلوة

وافضل دايما غنية بالناس اللى حواليا وحبهم ليا




Monday, September 14, 2009

آن الأوان




آن الأوان تفرح يا قلبى

تفرح بحب حبيب جميل

حبيب مفيش زيه مثيل

حبيب يكون لجراحك دوا

وتكون حياتكم هنا (هناء) سوا

ولما تزعل تلاقى قلبه

بيقول لقلبك فداك انا

ولما تفرح يكون معاك

ينشد غنا

يفرش زهور الحب هنا وهناك

آن الاوان تخلع يا قلبى

توب الجرح والاحزان

فى توب جديد

مغزول حرير

بيفوح بعطر فل وياسمين

يلا البسه

ورينى صورتك

بلاش تضيع احلى سنين

Tuesday, September 8, 2009

السلام عليكم ورحمه الله وبركاته

وحشتووووووووووووووووونى كتير اوى
معلش غبت شوية
بس كان فى احتلال للكمبو من اخويا واختى
وانا ياعينى غلبانة مش كنت باعرف اقعد عليه خالث
رمضان عدا بسرعة اوى
محسناش بالايام اللى عدت انهاردة 18 رمضان
يعنى اللى جاى اقل من اللى عدا
ربنا يتقبل مننا يارب
ويقدرنا اننا نزيد من الاعمال الصالحة
ويثبتنا على كل حاجة كويسة عملناها ونفضل نعملها طول عمرنا
يارب يكون كل الناس بخير وسعادة
ويكونوا دايما باحسن حال