Wednesday, December 31, 2008

سنة جديدة يارب تكون سعيدة

سلام عليكم

كل سنة وانتم طيبين

سنة هجرية جديدة وسنة ميلادية جديدة

يارب الاتنين يكونوا احسن من اللى قبلهم ويعدوا على خير

ويارب العالم كله يكون احسن ونتعلم من اخطائنا

بخصوص البوست اللى فات

باشكر جدا كل اللى ردوا

محمد

نبيل

د/ عمرو

ادم

فارس

مونى

باشكركم جدا على كلامكم الجميل

اللى فعلا خلانى اعيد تفكير فى كل حاجة

فكرت انى باحكم على نفسى بالاعدام

باتخلى عن الحاجة اللى باحبها وباستمتع بيها

وفعلا قررت انى هاظبط الامور بحيث ارضى جميع الاطراف

ربنا يخليكم ليا وميحرمنيش منكم ابدا

ودايما تكونوا جنبى لانى من غيركم اكتشفت انى ولا حاجة

Sunday, December 21, 2008

نهاية الرحلة


خلال رحلة البحث عن شخصيتى الحقيقية او كيانى

اكتشفت ان عندى شخصيتين

الشخصية الاولى ودى فى البيت مع بابا وماما واخواتى

ودى بنوتة خجولة جدا وحساسة وكتومة وزى البسكوتة وملهاش فى اى حاجة غير المزاكرة والمطبخ وصاحباتها
بتحترم كل الناس بغض النظر عن انها بتحبهم او لا

والشخصية التانية هى الاحسن بالنسبة الى باحبها اكتر

ودى بنوتة اجتماعية جدا دمها خفيف الى حد ما

بتحب كل الناس اللى حواليها

بتحب اصحابها وزمايلها اوى وشايفة انهم بجد اخوات ليها وتقدر تعتمد عليهم

ليها مدونة ومشتركة بمنتديات كتير وعلى الفيس بوك
بتكتب خواطر واغانى
بتقرا شعر وروايات رومانسية واجتماعية
بمعنى تانى
عندها حياة

تعرف ناس كتير اوى

والحمد لله ناس كتير منهم بيثقوا فيها وبيأتمنوها على اسرارهم
بس برضه فى حدود عندها لكل حاجة حتى الكلام
بتحاول متعملش حاجة غلط عشان احترامها لنفسها ولاهلها

المشكلة ان الشخصية التانية مخفية عن الناس الاولانيين
لانهم عملوا مشاكل لما عرفوا جزء من حياتها التانية

بس انا تعبت

تايهه بين الاتنين

بين اللى باحبة ومش مفروض اعمله

واللى باكرهه ومفروض عليا

عشان كدة قررت اتخلى عن شخصية من الانتين

هاتخلى عن التانية

بس عايزة اقول لكل حد عرفته

انا باحبك اوى اوى اوى

وانت بجد كنت حد مميز فى حياتى

وارجو محدش يزعل منى ابدا ابدا


Tuesday, December 16, 2008

الحب


1- الحب ايدين تطبطب وحنية وحنين وحضن فى يوم ما نتعب ودوا للمجروحين
(تتر مسلسل مباراة زوجية )

௨- الحب حلاوته فى ايه غير قلب بيحضن قلب وحبيب بيقول لحبيبه دة انا اول مرة احب
(أغنية ضمينى لايمان البحر درويش)

Friday, December 12, 2008

كلام فى الحب

*‏ ممكن ان تعطي دون حب‏,‏ مستحيل أن تحب دون أن تعطي‏!
‏! أنت لا تحب امرأة لأنها جميلة‏,‏ وانما هي جميلة لأنك تحبها*‏
*‏ لاتتزوج المرأة التي تريد ان تعيش معها‏,‏ وانما المرأة التي لا تستطيع ان تعيش بغيرها‏!